भागा जोगा रोज कर दिना तो एके नियर बितेला। मुदा जे दिन केउ घरे गोतिया बइन आय जायला तो एकरसता टूटेला। गोतिया आलक। कोनो तो कारने । नि तो का ले आतक। कोनो नवाँ खबर देक ले कि कोनो हामरे कर हाल-चाल जाने ले। ढेइर दिन ले गोतियामन नि आय रहयँ। बुझात रहे एकदमे निकमा अदमी होय जा ही। ना केखों मोहें पुछों, ना केउ मोखें पुछयँ। एतना कटाल-कटाल जिनगी। जिनगी कर बुझाय कोनो रसे नखे। आइझ गोतिया आलक तो जीव में जीव घुरलक कि मोहों कोनो हेकों नि तो केउ मोर घरे गोतिया का ले आतक? ढेइर दिनक बादे कतना-कतना छुटल-बढ़ल बात। रंगरिता कर गोइठ। नावाँ-पुरना गुद रल-बीतल घटना ले के आलक। मन हुलइस उठलक। मन का ले नि हुलस उठी! उकर आवन होय रहे मुरदार जिनगी मंे जान फूकेक ले। भुलल-बिसरल बात। देस-दुनिया कर गोइठ। रीझ-रंग कर तमासा। पढे़क-लिखेक, गुनेक-बुझेक बात। दिमाग के मांइज के चमकायक ले तो नि आ हे गोतिया? हतास, उदास, निरास, उदसल, मन में नावाँ आसरा कर आस जगायक ले तो नि आलक? थाकल-माँदल, हारल-भेदाल तन-मन में नावाँ जोस-हास आउर ताकइत भरे ले तो नि आलक गोतिया? बल-बुधि सँय सहिया जोराय के! गोतिया आते हें मुरझाल मन कर लटंग लहलहाय उठेला। जीव हरियर हाय जायला। फूल फूटेक लागेल हिया कर बगिया में। गोतिया जखन डेहरी में आय जायला। जिनगी जियेक कर सुरइत बदइल जायला। जान में, जीव जहान में, नस-नस में बिजली कर करेंट भइर जायला गोतिया आले। से हेके गोतिया। कतना मन भावन, कतना नगद, कतइ बेस। झारखंड तो गोतिया कर माइन-मरजाद के बेस रकम बुझेला। उकर माइन मरजाद करेक मंे तइनको मन के छव-पाँच नि करेला। तभे तो एक परिया ले गीत गाते आहयँं झारखंडिया मन - आय गेलयँ गोतिया- डिसाय देलयँ पटिया दुखम सुखम बतियालयँ गोतिया - आगे तो देलयँ लोटा रे पानी सेकर पाछे देलयँ चूना रे तामकू - लहर लागे ले भइया खोपा पोड़ाले ओह हाय रे हाय ......। गोतिया से जबर आउर कोन देव पितर होय सकयँना। इकर माइन मरजाद में कोनो कमी नी रइह जायला। रिन तो रिन मछरी किन इसने नि कहल जा हे। घरक अदमी रूइस-फुइस के अघाा जायँ तो अघाय जायँ, गोतिया के तो खुस करे ले बारहो बिरही कर उपाय-जतन तो करेक होइ। गोतिया कर सोवागत में तइनको ढिलाही नि होयक चाही रे बाबू-भइया, बहिन-बुचू बड़ा-बड़ी, आजा-नाना, सहिया-मितान। गोतिया रउर दुरा पोहँचत हे। दुरा कर सिकरी के बजात हे। उकर सोवागत ले जे बने से जतन करू। तिहा करू। गोतिया आवे, बराबइर आवे, इसन जुगुत करू। इसन सराजाम करू। आउर गोतिया कर असिरवाद पूरा गाँव-घर के एकेक झन के मिलोक। गोटे दुनिया कर नक्शा बदलेक। जिनगी पलटोक। रउरे मनक, घरे गोतिया आ हे। रउरे मनक, अपने मनक, तोहरे मनक, मनक इकछा के, बिचार के, जानेक ले। गाँव-घर कर देश-दुनिया कर दरकार के पुरजोर जगायक ले। सरकार आउर जनता कर दोस के बेेगर डर के बतायक ले गोतिया आवत हे। सावधान रहू। ढेइर दिन बेंड़ाल रही। आब अकिल आलक। डहर ले बेडहर होय जाय रही, से डहर धराय गेलक। देखू, सुनू, जानू, बुझू गोतिया का लानेक जात हे? गोतिया रउर भासा में, रउर बिचार में, रउर मन में जे आहे जे खोजत हे, हिया जे मनक भूख आहे, पियास आहे उके मेटायक ले आवत हे गोतिया। नागपुरी कर मानक रूप कर तिहा में। केन्द्रीय नागपुरी में गोतिया आवत हे। इकर में सीमान बोली, पड़ोसी बोली कर छहको भेटाइ मुदा ई गोतिया कर बोली-भासा बिचार सुंदर, मधुर, सरस, सरल होइ। हियाँ कर बात मनक बिचार कर गोइठ आउर सच, संुदर आउर लोकहित के धेयान धइर के चली गोतिया। बेस लागे तो घरे इके कोना देउ।

- बीरेन्द्र कुमार महतो .