??? 3, ??? 1, ???-????? 2010
?????????
झारखंड राइज कर गठन जबर सपना कर संग होय रहे। लगिन हियाँ कर राजनेतामन ऊ सारा सपना के माटी में मिलाय देलयँ। झारखंडी भासा-साहित, कला-संस्कृति, इतिहास-बर्तमान सउब कुछ खतम होयक लाइग हे। झारख्ंाड का रहे? आउर आइझ का होय गेलक? झारखंडी मनक बथा-पीरा, बेचइनी आइझ केखो नि दिसत हे। हियाँ कर टुवर-टापर राजनेतामन खाली दिकु मनक हाथ कर खेलवँना मात्र बइन के रइह जाय हयँ। बीतल नव बछर में जब-जब नावाँ मुख्यमंत्री बनलक, तब-तब दिकु भासा के राइज कर राइज भासा बनायक कर घोसना करल गेलक। इ झारखंडी जनता कर दुर्भाइगे कहल जाय सकेला कि राइज कर सउबसे पेयारा अगुवा दिसुम गुरू हों दिकुमनक भासाय में बोलेक सुरू कइर दे हयँ। जानू इनकर से झारखंडी जनता के तनी उमेद रहे, लगिन आब तो ऊ उमेद हों धूंधूर दिसत हे।
हामरे के जानेक चाही कि गोटा देस में हर छन एक ठो भासा मरत हे, आउर सरकार दन ले इ दिसा में कोनो खास कोसिस नइ करल जात हे। कय ठो आदिवासी भासामन उपेक्षा कर सिकार आहयँ आउर लगसते बिलुप्त होवत हयँ। नेशनल ज्योग्राफिक सोसाइटी आउर लिविंग टंग्स इंस्टीट्यूट फॉर एंडेंजर्ड लैंग्वेजेस कर मोताबिक हरेक पखवाड़ा एक ठो भासा कर मिरतु होत हे। सन् 2010 तक धरती पर बोलल जायक वाला सात हजार से जादा भासामन बिलुप्त होय सकयँना। ऊमन में से कय ठो कर बारे में तो रेकार्डो नखे। हामरे के जानेक चाही कि एक भासा कर मिरतु सिरिफ एक भासाय कर मिरतु नइ होयल, बलुक उकर संगेहें ऊ भासा कर गेयान भंडार, इतिहास, संस्कृति आउर उकर से जुड़ल तमाम तथ्य आउर मनुस्य हों इतिहास कर हिस्सा बइन जायला। जोन आधुनिक सभ्यता उपरे हामरे गर्व करिला दरअसल ऊ झूठा अहम हेके। भासा धरोहर हेके आउर मुधधारा में लानेक कर नाँवे हाम आपन माँय भासा के हेजाते जात ही। हामरे के जानेक चाही कि आदिवासीमनक भासा ढेइर उन्नत आहे। ऊमन में पारंपरिक गेयान कर खजाना हय। सरकार जहाँ दोसर-दोसर दिकु भासा के राइज भासा बनायक ले प्रोत्साहन जारी राखले हय, हुवाँय आदिवासी भासामन बिलुप्त होते जात हयँ। इ दिसा में सरकार के गंभीरता पूर्वक बिचार करेक चाही। आपन माँय भासा के बचायक खातिर सकारात्मक पहल कर आइझ जरूरत आहे। हामरे कर राजनेता, बुद्धिजीवी आउर सरकार के दिकुमनक सडयंत्र के बेरा सिरे बूझेक होवी, नइ तो भासा कर संगे-संग हामरेमनक अस्तित्वो सिराय जाइ।
