- बीरेन्द्र कुमार महतो

बेरा कर चकरी किंदरलक, झारखंड आठ बछर कर होय गेलक। ई आठ बछर में छव गो सरकार बनलक। नव दिने अढ़ाई कोस कर चाइल से सांस्कृतिक झारखंड बइन रहे नावाँ-नावाँ उमंग लेइ के। झारखंड में झारखंडी पूतमन सरकार बनाबयँ। राइज चलाबयँ। झरखंडी मनक काय जुग से जँताल, तोपाल मनक इच्छा पूरा होइ। पुरना माँगमन आब पूरा होइ। आपन माँयभासा में पढ़ाई होइ। झारखंडी भासा अकादमी बनी। झारखंडी साहित झारखंडी बसंत लखे फूली-पहलाइ आउर झबइर जाइ, रंगा-रिता कर फूल तइर। से फूल साहित मधु रसे गोटे झारखंड के समरस कर सोम पान कराइ। जे वादा करल गेलक, पूरा नि होलक। सिद्धांत आउर बेवहार में कोनो तालमेल नइ। नावाँ राइज तो बनलक, लगिन जोन मुक्ति कर चाह रहे ऊ आइझ हों सकार होते नि दिसेला।
मुखिया,बिधायक,सांसदमन बने ले चाहे कोनो लाभक पद पायक ले कोनो तिकड़म करे ले अदमी पाछे नि रहत हयँ। आउर जनता कर भाइग से बइन जात हयँ तो बुझू जनताय कर पोटा दुहरेक में कोनो लाज सरम नइ। आपन कोठा अटारी के चमकात हयँ, सुख सुविस्ता के जोरले में जोरत हयँ। गरीब गुरबा जनता के अनिवार्य शिक्षा, स्वास्थ्य, सुरक्षा, नेयाय, रोजगार मिलत हे कि निही सेकर कोनो फिकिरे नइ। झारखंडी के झारखंड में कामे नि मिलत हे। इमन के बाहरे दूसर प्रदेसमन में बेचत हयँ। आउर बाहरी हियाँ काम कर खोजार में आय मोरत हयँ। चपरासी से उपरे तक सब एखनो बिहारे राइज तइर चलत हे। झारखंड तो उपरे हेंठे ले मालामाल आहे तइयो झारखंडी कंगाल आहयँ। करज उपरे करज बढ़ते जात हे। कंगाली दूर करे ले कोनो जतन नइ। कोनवे सपना नइ। अदमी आउर नेता दुइयो मोरत हयँ नावाँ झारखंड भीतरे। केउ भूख से, केउ दूध पी के तो केउ मलाइदार बिभाग ले। का होइ ई राइज कर!