- बीरेन्द्र कुमार महतो

उत्सव कर ई अइसन रूप हेके, जेकर भाव-मुद्रा चकित हों करेला। विस्मित हों। इकर में उत्साह हों जागेल आउर वितृष्णा हों। ईमन के रिझाबो करेल आउर कखनो-कखनो इकर से खीझ हों होवेला। ई फगुवा हेके। रंग कर ई महापरब के मनायक कर परंपरा जेतना पुरना हय, ओतनेहें गौरवसाली आहे ऊ कहनीमन जे इकर से जुड़ल आहे। फगुवा कर मायने आइझ भले हें बदअइल जाय हे पहें नी बदइल हे ऊ सभ्यता जे ई तेवहार कर केंद्र रहे आउर रही।
मार्च कर महीना अंतरराष्ट्रीय महिला दिवस कर रूप में हों जानल जायला। घर, परिवार, समाज आउर जीवन कर हर मोड़ पहें महिलामन कर दुनिया बदअइल जाय हे इया बदलाव कर बयार में उमन खुद के बदअइल ले हयँ।
ऐतिहासिक तथ्यमन से स्पष्ट होयल कि सभ्यता बिकास कर क्रम में एक दउर अइसन रहे जब समाज मातृसत्तात्मक रहे, यानी महिला परिवार आउर समाज में मुध भूमिका निभात रहयँ। उत्पादन बेवस्था में परिवर्तन कर संगेहें समाजिक नेयाय नीतिमन हों बदअइल गेलक। दास-प्रभु समाज बेवस्था कर बाद सामंती बेवस्था कर आगमन कर संगेहें सामाजिक आउर पारिवारिक संरचना अइसन बनलक कि महिलामन के घर कर भीतरेहें बंद होयक पड़लक। महिलामन कर वर्तमान स्थिति ले जिमवार पुरूस नइ बलुक असमानता आउर सोसन पहें अधारित ई समाजिक बेवस्था हेके।
झारखंडी महिलामन आइझ आपन दम-खम पहें देस आउर बिदेस में सफलता कर झंड़ा फहरात हयँ। ई अंक में अइसनेहें संघर्षशील आउर जुझारू महिला साहितकार मन कर बारे में जानकारी देवल जात हे। खास कइर के जेमन नागपुरी भासा आउर साहित के अगुवायक ले काम करत हयँ।
नवाँ बछर आउर फगुवा कर ढेइर-ढेइर सुभकामना!