- बीरेन्द्र कुमार महतो

सच में देखल जाय तो हामरेक राइज इया देस में सूखल कर राजनीति हों राजनीति कर प्रकृति से जुड़ल आहे। हर नेता आपन क्षेत्र के हराभरा देखेक कर संगे-संग जदि कोई नेता ई चाहे कि उकर नेतागीरी हों हराभरा बनल रहे, तो इकर में गुनाह कोन बात कर आहे? ऊ मन सूखल से आपन क्षेत्र के बचायँना। सब्सिडि आउर बितीय मदइत से पार्टी काजकर्तामन आउर संगेहें आपन राजनीतिक आकांक्षाव के हों।
सूखल कर राजनीति केर हें ई चमत्कार आहे कि कखनों-कखनों पक्ष आउर बिपक्ष दुइयों दलक नेता मनक क्षेत्र में फसल लहलहायला, लगिन दुइयों हें सूखाग्रस्त क्षेत्र घोसित कइर देवल जायला, कालेकि दुइयों हें दलक नेतामन अपन-अपन नेतागीरी सूखेक से बचायक चाहयँना। जहाँ ना तो कोनो सरकारी पक्ष आहे आउर ना बिरोधी पक्ष। कम से कम ई मुद्दा उपरे बहुत बेर सरकार आउर बिपक्षी पक्ष मिल के काम करयँना। चाहे ऊ अपन खुद कर अस्तित्व के बचायक ले हें काले नइ सही। सूखा घोसित क्षेत्र फिन भी एक ठो तीर्थ अस्थल तइर बइन जायला। जहाँ बिभिन्न गैरसरकारी स्वयं सेवी संगठन कर काजकर्ता, बिभिन्न राजनीतिक दल कर नेता आउर तो आउर मीडिया जगत से जुड़ल अदमीमन हों ऊ क्षेत्र कर दउड़ लगायक में पाछे नइ रहयँना। कालेकि एतना बेस मरचइ-मसाला आउर कहाँ भेंटाइ, ई सोइँच के पत्रकार आउर लेखक हों हुआँ पोहँइच जायँना।
सूखाग्रस्त क्षेत्र में ब्यापारी बर्ग कर अदमी मनक हों ढेइर मुनाफा होयला। सच तो ई हय कि सूखा कर चपेट में सउबसे जादा गरीब बर्गे पिसायला। सूखल जइसन बड़ प्राकृतिक आपदा उपरे राजनेतामन ले ‘रस्म अदायगी’ जरूरी हय आउर ई रस्म के राजनेता, नौकरसाह आउर ब्यापारी मनक संगे-संग बिभिन्न स्वयं सेवी संगठन कर अदमीमन हों बड़ मुस्तयदी से पूरा करयँना।
सरकारी तंत्र कर अदमी के अपर्याप्त आँकड़ा कर बल पहें सिरिफ एहे कहते पावल जायला कि ‘इस्थिति काबू में हय।’ हुँवायँ दोसर दन राजनेता सूखल कर प्रति अपन देखावटी चिंता के ब्यवसायिक बर्ग से ई अनुरोध आउर अपील कर संगे ब्यक्त करयँना कि ई बिकट परिस्थिति में राउरे खायेक-पियेक समान कर दाम में बढ़ोतरी ना करू। बलुक ऊ समान मनक कीमत के यथावत बनाय के राखल जाय। इकर पाछे सूखल से जूझेक उनकर अपन जिमवारी सिराय जायला। साइद ई राजनेतामन ऐहे तइर कर सेवा करेक मानसिकता पोइस के राजनीति में ढुकयँना।