??? 2, ??? 2, ??????-????? 2009
?????????
‘बेगर काँदले माँय हों आपन छउवा के दूध नि पियायला’, ई बात सोला आना सच आहे । लगिन ई बात झारखंड ले सच नि बुझायला। काले कि कय बछर से हियाँ कर अदमीमन आपन भासा, संस्कृति आउर आपन पहचान खातिर लड़इ लड़त हयँ। मुदा ऊ मनक तड़प, बथा-पीरा, भूख केकहों नि दिसत हे। भला दिसबो का रंग करी। नेतामन आपन दाँव, लेखक-साहितकारमन आपन नाँव तो संस्कृतिकर्मीमन पचास-सयँ कर फेर में। संगे-संग आउरो दोसर-दोसर बड़का-बड़का बाबू साहेबमन, सउब सिरिफ आपन-आपन सुख-सुबिधा कर चिंता-फिकिर आउर जोगाड़ में राइत-दिन डुबल रहयँना। का पुरखामन एहे दिन देखेक खातिर लड़इ लइड़ रहयँ? ऊ मनक तो आत्मा हों ई दसा देइख के काँदेक बात तो दूर, कुँहकेक हों नि पारत होइ।
राउरे के ई जाइन के बड़ा अचरज होइ कि छत्तीसगढ़ जे आपन भासा संस्कृति आउर पहचान ले कोनो तइर कर लड़इ नि लइड़ रहे, ऊ छत्तीसगढ़ी के 2008 मेंहें राइज भासा बनाय दे हे। आब हुआँ कर सउब सरकारी कामकाज छत्तीसगढ़ीये में होवेक लाइग हे। आउर तो आउर नेपाल सरकार दन ले नागपुरी में हफतावारी खबर कागज ‘नयाँ बिहान’ छापल जात हे। उड़ीसा, राउरकेला से छउवामन ले नागपुरी में ‘दुलारी बहिन’ पत्रिका निकलत हे। बांग्ला देस में होवल अंतरराष्ट्रीय नाट्य महोत्सव में नागपुरी नाटक कर प्रदर्सन करल जाय रहे। लगिन ई बात कर जानकारी केतइ अदमी के आहे? आउर नखे तो काले नखे? ई बहुत जबर सवाल हय हियाँ कर नाँव बाजल भासा पेरेमी आउर संस्कृतिकर्मीमन ले। जब-जब झारखंड में राइजभासा बनायक कर बात उठेला तो दिकू मनक भासाय के हियाँ कर राइजभासा बनायक बात करल जायला। का ले भला? आपन माँय के आपनेहें घरे अपमानित करल जात हे। जाइत-धरम आउर भासा कर नाँवे आदिवासी-सदानी एकता के तोरेक कोसिस करल जात हे? आइझ गोटा झारखंडिया आपसे में एक दोसर कर सउबसे बड़ दुश्मन बइन जाय हयँ। इकर जिमवार के हेके? जेखन राउर भासा-संस्कृति सिराय जाइ सेहे बेरा राउरे कर आपन पहचान आउर अस्तित्व हों मेइट जाइ। आपनेहें घर-दुरा में टुवर-टापर आउर बाँझ होय, बेगर हाड़-माँस कर मुरदा अदमी तइर बइन के रइह जाब। सँयकड़ों बछर से जादा बेरा सेहें जेकर आपन भरल-पूरल कला, साहित-संस्कृति आउर भासा आहे, उकर अइसन दुर्दसा!
