- बीरेन्द्र कुमार महतो

अदमीमन आपन सवार्थ खातिर अपने टांगा से आपन गोड़ के काटेक लाइग हयँ। बगरा कमायक आउर बगरा पावेक खातिर प्रदूसन के नेवता देवेक लाइग हयँ। आइझ दुनिया कर सउब देस में ई एक ठो मुड़बथा बइन जाय हे। अदमीमन के एखनों गेयान नइ होय हे। आपन सुख-सुबिधा के बढ़यक ले धरती कर उपरे आउर भीतरे, दूइयों कर दसा के बेगड़ाय के राइख दे हयँ। एहे ले आइझ जबर बेमारीमन हों गाँव कर रहइयामन के जकइड़ के राइख दे हे। धरती में तो दिनों-दिन गरमी बढ़तेहें जात हे। बन-पतरा सउब के अदमीमन आपन सवार्थ खातिर काटते जात हयँ, जेकर से केतई चँरई-चिरगुन, जीव-जनतुमन मोइर सिरात हयँ। हजारो बछर पहिले ई गोंडवाना लैंड रहे जहाँ जबरकाया वाला जीव डायनासोर रहत रहे। मुदा एहे प्रदूसन कर बढ़ल से खायक पीयेक जुगत नइ भेंटालक, आइझ ई दुनिया सेहें खतम होय गेलक। आब कहियो हियाँ नइ भेंटाइ। से ले अदमीमन के सोइँच-समइझ के काम करेक चाही।
धरती कर बढ़ल गरमी से गोटा दुनिया कर बरफ पसरते जात हे, जेकर से रहेक ठाँव में पानी डाइब देत हे। रहेक ले अइसन बुझाय कि थोरेक दिन बाद ठाँवों नइ भेंटाई। धरती कर हेंठे हों पानी प्रदूसित होय जात हे। पीयेक लाइक नखे। दुनिया कर कतवार दिनों-दिन भइर जात हे। हामर राइज में धनबाद कर हेंठे आइग लाइग जाय हे। जमीन में जादा पइदावार खातिर खाद आउर दवइ मनक प्रजोग करल सेहों जमीन प्रदूसित होवत हे। ई सउब बिसय ले गोटा दुनिया कर पढ़ल-लिखल आउर बिदुवानमने बइठकी करयँना, मुदा कोनो उपाय नइ भेंटायला। कोनो सुधार नखे आउर ई दिनो-दिन आउर बिकराल रूप धरते जात हे। बेगयानिकमन तो अइसन अंदेसा कइर हयँ कि ग्रीन हाउस के नइ रोकले धरती कर गरमी बइढ़ जाइ। ई सदी कर आखरी में एक अरब अइमी के पानी पीयेक हों नइ भेंटाई। गरम कर चलते काय ठो जीवमन हों मोइर सिराबयँ।
ई सउब से बाँचेक ले अदमीमन में जागरूकता करेक पड़ी। छउवामन के इस्कूल-कोलेज मेंहों पढ़ायक पड़ी। गँवइयामनके हों गछ-बन-पतरा मनक रहल से फायदा मनके बतायक पड़ी, तभे ई समस्या कम होवी। आपन हीत छोइड़ के सउबकर हीत सोंचेक पड़ी।